AMPATI: Azadi Ka Amrit Mahotsav – North East Festival aro Meghalaya a·dokni bilsi 50 gapaniko maniani bak gita Bristibar salo, Betasing Block-ni Block Mission Management Unit (BMMU) aro South West Garo Hills District Administration nangrimenba, Self Help Group (SHG) Mela aro Financial Literacy Camp-ko Betasing-o ong·atangaha.
Ia SHG Mela-ko ong·atanio Betasing Block-ni ning·o donggipa dingtang dingtang SHG-rangni stall-rangna agreba, NRLM, MHIS, DDU-GKY, bank-rang, Health, Aadhar-na biming segatani, COVID-19-na tika su·ani aro uandakgipa dingtang dingtang stall-rangkoba donangaha.
Ia program-ko ong·atanio dingtangmancha seokgimin dolgittam village organisation (VO)-rangna NRLM-ni Community Investment Fund-ni bak gita South West Garo Hills a·jani Additional Deputy Commissioner AVD Shira-ni jakchi cheque-rangkoba suale on·angjolaha aro ia tom·anio Betasing C&RD Block-ni BDO WRG Momin, DM&HO Dr Malay Hajong aro gipin official-rangba dongpae bak ra·angaha.
Ia SHG Mela-ko ong·atanio, dingtangmancha a·sel ong·ani ja·man an·tangni jakasiko gimaatna nanggipa Bandalkona songni Trishna Ch Marak-na nambatgipa SHG membor-ni boksisko on·angaha. A·sel ong·anio an·tangni jakasiko gimaatna nangahaoba ia me·chik, NRLM-ni ning·o SHG-ni bak ong·pae an·tangni janggi tanganiko dingtangatna man·ahani gimin una dingtangmancha boksisko on·angaha.
