SHILLONG: Shillong songjinmani Umiam dolongko naljoke rakkina gita a·dok sorkari, nanga gita ja·kurangko de·gen ine Bristibar salo, Meghalaya a·dokni Chief Minister Conrad K Sangma, ku·rachakaniko on·ataha.
Umiam dolong be·na skangan Umiam dolongko tarina gita ta·raken kamrangko ka·china Meghalaya High Court-ni ge·etaniko on·angani ja·man a·dokni Chief Minister, ia ku·rachakaniko on·angaha.
“Umiam dam-o be·srianirang dongani gimin a·doko songdongenggipa manderang aro a·dok sorkariba jajrengchakenga. Chinga nanga gita kamrangko ka·na ta·raken am·sandianirangko dakgen,” ine Chief Minister aganaha.
Umiam dolong gita re·ruraenggipa garirangko amchakna gita ia dolongko bilakbate rikna National Highways Authority of India (NHAI) aro Border Roads Organisation (BRO) ku·rachakahani gimin ian ka·dongatani gita ong·aha ine Budbar salo, Meghalaya High Court parakatahachim.
“Ia dolong gita MT 10 bate jregipa garirangkode re·na on·na nangja ine BRO-ni affidavit-o janapaha. Ia dolongo da·o indita garirangni re·ruraanirangkode amchakjawa ine nikna man·enga. Ia Umiam dolong be·na skangan ta·rake kamko ka·na nangengaha,” ine High Court-ni on·atgipa ge·etanio parakataha.
Ia dolong nosto ong·dapjana gita MT 10 bate jregipa garirangni re·ruraanirangko champengan baksana apsan somoio dal·dalgipa gari bolgnini re·ruraanikoba champengna nanga ineba High Court parakataha.
Ia Umiam dolongko tarina gita nanga korosrangna a·dok sorkari, ma·mong sorkari baksa agangrikna nanga ineba High Court aganaha.
