SHILLONG: North Eastern Hill University (NEHU)-o bak ong·enggipa pilak college-rangon undergraduate course-na admission ra·enggipa chatro chatrirang, Common University Entrance Test (CUET) porikkako ia bilsionin sena nangtokengahani gimin ia CUET-na register ka·ani tarikko ra·doatchina gita Meghalaya a·dokni BJP dol, ma·mongni Union Education Minister-ko didiataha.
BJP Meghalaya Pradesh-ni president Ernest Mawrie-ni parakatani gitade, Meghalaya a·dokoba NEHU-o bak ong·enggipa college-rango BA, BCom, BSc aro uandakgipa undergraduate course-rangna CUET porikkako sechengna nangengahani gimin ian undergraduate course-ko dakna nangenggipa chatro chatrirangni admission ra·anio namen neng·nikaniko ra·baani gita ong·engahachim.
“Meghalaya a·dokni bang·bata chatro chatrirangan ia gital niamni gimin tale ma·sitokkujaengnaba gnang aro ia CUET-na register ka·ani bon·kamgipa tarikara May 6 tarikon ong·engahani gimin bang·bata chatro chatrirangan ia porikkana register ka·tokkujaengnaba gnang. Register ka·rikgijagipa chatro chatrirangde CUET-ko sena man·pajawaha aro CUET-ko serikjahaode college-rango admission-ko man·tokjawa. Uni gimin a·dokni chatro chatrirangna register ka·na cholko on·na gita bon·kamgipa tarikko ra·dodapatchina chinga mol·molenga,” ine Mawrie, Union Education Minister-na seatgipa chittio parakataha.
Da·o dipet Meghalaya a·doko CUET centre Shillong-osan dongkuengpiti aro Class XII pass ka·gipa bang·bea chatro chatrirangko ia centre damsano porikka seataniara ong·na amgijani ong·gen ineba Mawrie parakataha.
“College-rango admission-ko June July jarango ra·rongbata aro ua somoiode college-rango bang·en neng·nikanirangko chagrongna nangtokgnok. Haida iandakgipa neng·nikanirangko chagrongna nanggenchimode so·sojengjeng ong·anirangba chol donga. Uni gimin chatro chatrirangko ia CUET-na register ka·na man·na gita somoiko on·dapchina chinga mol·molenga,” ine BJP Meghalaya Pradesh-ni president parakataha.
