SHILLONG: Adhoc skulrango skigiparangna dormahako bariatgenchimoba skigiparangna jaanti dormahako on·na man·jaode namgni dongjawa ine a·dokni Education Minister Lahkmen Rymbui talataniko on·angenba, tangkarang chu·onga gita dongani krisa skigiparangna dormahako bariatna man·gen ine parakataha.
“Chinga chingni bilni krisa skigiparangni dormahako bariatna man·gen. Skigiparangni dormahako bariatna skangba chinga skigiparangna jagittam jabri dormaha on·na man·gijanikosa namatchengna nangenga,” ine Rymbui, kobor ra·timgiparangna aganaha.
Skigiparangni dabianirangko chu·sokatna gita seachi ku·rachakaniko on·china dabie Federation of All School Teachers of Meghalaya (FASTOM)-ni sorkarina antisa somoiko on·enggipani bidingo sing·on, skigiparangni dabianiko sorkari name niengkuani gimin saksa sakgipino ka·donggrikna nangenga ine Education Minister parakataha.
“Ka·donggija ong·aniara an·chingna maming namgni dongjawa uni gimin ka·donggrikaniko an·chingna nangchongmota. Neng·nikanirangko walsanode namatna man·jawa,” ine ua aganenba, dormaharangko on·na man·ani krisa adhoc skigiparangni dormahako sorkari bariatna man·aigen ine parakattaiaha.
Adhoc skigiparangni dabianirangko chu·sokatna gita sorkari ku·rachakaniko on·jaengani gimin re·anggipa jaonin FASTOM-ni ning·o skigiparang, sorkarini kosako non-cooperation movement (NCM)-ko dakna a·bachengatahachim indiba skigiparangna seachi ku·rachakaniko on·naba gnang ine ka·donganirang baksa skigiparangni NCM-ko May 2 tarikoni antisana dontongatchengahachim.
Indake ong·genchimoba, ia antisani gisepo sorkari, skigiparangna maming ku·rachakaniko on·jagenchimode May 10 tarik dipet bilakbate jingjengatangskana FASTOM manchie donangahachim.
“Adhoc skulrango skigiparangni dormahako gong 18,000-chi bariatan baksana bilsiprakon 5 percent-chi bariatchina dabianiko sorkari niengkua ine aganengani gimin chinga seachi ku·rachakaniko on·china nangnikenga,” ine FASTOM-ni general secretary Andrew Lyngkhoi, kobor ra·timgiparangna parakataha.
