SHILLONG: College-rango undergraduate course-na admission ra·na nangenggipa chatro chatrirangna Common University Entrance Test (CUET) porikkana register ka·ani bon·kamgipa tarikko University Grants Commission (UGC), May 22 tarikona ra·doataha.
Iani bidingo jinmana u·iataniko on·atengon, dingtang dingtang university-ni ning·o undergraduate course-na admission-ko ra·na nangenggipa chatro chatrirangna CUET-ko sena gita register ka·ani bon·kamgipa tarikko re·baenggipa May 22 tarik attamni 5:00 bajiona ra·doataha une UGC-ni Chairman Mamidala Jagadesh Kumar parakataha.
Undergraduate course-rangna admission ra·na nangenggipa chatro chatrirang, ia CUET porikkako sena gita cuet.samarth.ac.in official website-o register ka·na man·gen ineba UGC-ni Chairman parakataha.
“CUET-na register ka·ani bon·kamgipa tarikko chinga May 22 tarikona ra·doataha aro ian chatro chatrirangna CUET-ko sena gita cholrangko on·dapani ong·gen ine chinga ka·dongenga,” ine M Jagadesh, social media-o parakataha.
Iana skangde, CUET porikkana register ka·ani bon·kamgipa tarikara May 6 tarikko on·soahani a·sel bang·bata chatro chatrirangan neng·nikanirangko chagrongna nangtokengani gimin register ka·ani bon·kamgipa tarikko ra·doatchina gita dingtang dingtang dolrang dabitokengachim ine nikna man·a.
