SHILLONG: South Garo Hills a·jani Gasuapara-o chimonge dongipa koelarangko name hisapchina gita Tura-ni BJP MDC Bernard N Marak didiangaha.
Marak-ni parakatani gitade, Gasuapara-o chimonge dongipa koelarangko nikna man·engoba koelarang inditana bang·jachim.
“Ia koelarangara niam gita bikotgiminma niam gri bikotgimin koelarang, sorkari chingna talate on·na nanga,” ine Marak dabiangaha.
Meghalaya a·doko niam gri koela bikotaniko jegale dongchajachina a·dok sorkariko didiangengon, ia koelarangko banoniko ra·baenga, uko manderangna talate on·china BJP-ni dilgipa dabiangaha.
South Garo Hills a·jani Gasuapara-o galgimin koelarangko Bangladesh a·songona salangna gita Jai Maa Coal Private Limited minggipa company-na permit on·aniko Shillong-oni Kingstone Bolwari minggipa mande saksa jegalatenba, ia company-na on·gipa permit-ko ra·pilchina gita adita salrangna skangsan a·dokni Chief Secretary-ko didiatahachim.
Iani bidingo a·dokni Chief Secretary-na badi ka·e sedoatengon, Gasuapara-o chimonge dongipa koelarang dongja aro ia permit-chi ia manderang, South Garo Hills a·jao niam gri bikotenggipa koelarangkosa salskaenga ine Kingstone parakatahachim.
Kingstone-ni parakatani gitade, koelarangko salna gita April 28 tariko, Meghalaya sorkarini Under Secretary, M/s Jai Maa Coal Pvt Ltd-na permit-ko on·ahachim aro uni ja·man Gasuapara-o gale donenggipa koelarangko Bangladesh-ona salangna gita Deputy Commissioner, April-ni 29 tariko jegalgimin order-ko on·ahachim.
Koelarangko Bangladesh a·songona watatna gita gipin biaprangoniko Gasuapara Land Custom Station-ona salbana gitasa permit-ko on·aha ine sorkari a·kangengon, ia Jai Maa Coal Private Limited company, South Garo Hills a·jao niam gri bikotdaldalenggipa koelarangkosa salangskaenga ineba Kingstone matnangatahachim.
