FASTOM-ni dilgipa Mayborn Lyngdoh-ni parakatani gitade, a·dok sorkario chu·onga gitan tangka paisarang donga ine uamang koborko man·soaha indiba skigiparangni dormahako sorkari bariatna gisik nangteljaengasachim.
“Chinga sorkario donggipa tangka paisarangni gimin am·sandianirangko dakaha aro sorkario badita tangka paisarang donga uko ma·simanahani gimin skigiparangni dormaharangko bariatna gitaba tangka paisarang chu·onga ine chinga ma·siachim. Chingni dormahako sorkari bariatna gisik nangteljaengani gimin sorkarini gile man·gipa kajinarangni bidingo chinga bakan jinmana parakatgen,” ine FASTOM-ni dilgipa parakataha.
Skul nokrangko taridapna gitade sorkari tangka paisarangko jakkalna kusi ong·enga indiba skigiparangni dormaharangkode maini gimin bariatna sikjaenga ineba FASTOM sing·doangaha.
“Skulrango poraienggipa chatro chatrirangna skie on·gipa skigiparangan dongjagenchimode skul nokrangko taripani mai orto?” ine Lyngdoh sing·doangaha.
A·dokni adhoc skulrango skigiparangni neng·nikanirangko namatna gita a·dokni Chief Minister Conrad K Sangma an·tangan 2019 bilsini August jao ku·rachakaniko on·ahachim indiba da·o Chief Minister aro gipin dilgiparang, an·tangtangni ku·rachakanirangko chu·sokatna jechaktokengaha ineba Adhoc skigiparang, suk ong·gijaniko parakataha.
Adhoc skigiparangni dormahako 2016 bilsionin bariattaia dongkujaengani gimin skigiparangni dormaharangko bariatna gita Chief Minister an·tangan ku·rachakahachim ineba FASTOM parakataha.
Adhoc skulrango skigiparangni dormahako gong 18,000-chi bariatan baksana bilsiprakon 5 percent-chi bariatchina gita dabitokengon, ia dabianiko chu·sokatna gita sorkari seachi ku·rachakaniko on·jagenchimode May 10 tarik dipet bilakbate jingjengatanirangko dakanggnok ine FASTOM mikrakataniko on·angahachim.
Indake ong·engon, adhoc skulrango skigiparangna dormahako bariatgenchimoba skigiparangna jaanti dormahako on·na man·jaode namgni dongjawa ine a·dokni Education Minister Lahkmen Rymbui talataniko on·angenba, tangkarang chu·onga gita dongani krisa skigiparangna dormahako bariatna man·gen ine parakatskaahachim.