SHILLONG: (UNI) Mines and Minerals (Development and Regulation) Act, 1957-O pangchake maming bil on·ani gride a·doko rong·chunrangko bikotaniko champengchina gita Meghalaya High Court-ni ge·sa division bench, a·dok sorkariko aganaha.
A·doko niamgri rong·chunrangko bikotengani gimin saksa social activist Lawyerson War-ni PIL on·gipani bidingo Chief Justice Sanjib Banerjee aro Justice Wanlura Diengdoh mangko man·chape dolsa bichal ka·gipa dolni hearing-ko dakani ja·mano mija Sukrobaro ia rai ba ge·etaniko on·angaha.
Unomitingo court-ni am·gipana a·dok sorkari, uamangni kam ka·ani kingsa report-ko on·aha. Advocate General Amit Kumar indake aganaha je tik ong·gijarangko tik ka·na gita Meghalaya Minor Minerals Concession Rules, 2016-oniko aditarangko taridapaha.
Unomitingo, tik ong·a ba ong·gijanirangko namatna kam ka·bo ka·jabo, Mines and Minerals (Development and Regulation) Act, 1957-o pangchake mamingba bil on·ako man·gijade, niamgri rong·chun bikotenggiparangko champengna nanga ine ccourt raiko on·aha.
A·dokni authority-rang maming bil on·jamangoba a·doko rong·chunrangko chotchanggijan bikottokenga ine saksa social activist Lawyerson War-ni court-o PIL on·ahachim.
