TURA: Jal Jeevan Mission (JJM)-ni ning·o songni nokni manderangna ringani chirangko on·na man·na gita adita salrangna skang, Dalu Water Supply Scheme (WSS) aro Khujikura Water Supply Scheme (WSS)-na pangchakaniko Dalu-ni MLA Brening A Sangma, Dalu Khujikura skul noko songe on·angaha.
Ia song damgnini WSS-na pangchakaniko songe on·angani somoio Dalu-ni MLA, jinmana aganprakangengon, Dalu WSS-na gong 8,80,00,000-ko chamataha aro ia Dalu WSS-ni ning·o Chaipani A, Chaipani B, Killapara A, Killapara B baksana Gangbanga songrangko man·gen ine parakangaha. Khujikura WSS-ni gimin talataniko on·angskaengon, ia scheme-na sorkari, gong kror 14-mangko chamatskaaha aro ia scheme-ni ning·o, Khujikura, Dapgre, Lower Bamonpara, Godagre, Asiragre, Kongtokpara, Baburambil aro uandakgipa songrangna ringani chirangko on·angskagen ine Sangma parakataha.
Ia song damgnini WSS-na pangchakaniko songe on·anganio dongpae bakko ra·anggipa gipin manderangara, Dalu C&RD Block-ni Block Development Officer Dr U. T. Ch Sangma, PHE Dalu-ni SDO TT Sangma, PHE Tura Division-ni Executive Engineer JM Sangma aro gipinrang ong·a.
