TURA: Tura-oni Garobadha-ona tariangenggipa rama da·o antignini ja·manon nosto ong·na a·bachengengaha. Ia gital tarigipa ramako adita salrangna skangsan a·dokni Chief Minister Conrad K Sangma niangahachim aro ia ramako ua jachipchangenba, an·tangan social media-rango mesokatahachim.
Ia ramako taripiltaina skangde ia ramani bang·bata bakrangon a·kolrara dake manderangni re·ruraanirango namen neng·nikanirangko chagrongna nangtokahachim.
Uandaken ia ramako sorkari, taripiltaina gita ge·etaniko on·aha aro antignimangna skangsan ia ramani bang·bata bakrangkon gital dake tarimanahachim.
Ia ramako tarimanani ja·man a·dokni Chief Minister-ba ia ramako niange, ia ramani namahani gimin an·tangni kusi ong·aniko parakatahachim.
Indake ong·genchimoba, Budbar salo, ia ramako re·ange nitaion, ramani badiaba badiaba bakrangode da·on gil·gaoanirangko aro a·kol dakaniko nikna a·bachengskaahachim.
Ia ramani chu·gimik bakrangko tariani matchotsrangkujaengon, badiaba badiaba bakrangode da·on nosto ong·na a·bachengskaengahani gimin jolo songdongenggipa manderang aro ia ramako re·ruraenggipa manderang suk ong·gijaniko parakattokaha.
“Ia ramako tarianirang namsrangjaha aro iandake tariaigenchimode ia rama bang·e baigipa ong·jawa. Ia ramani mitam bakrangko taria matchotangengahani gimin chinga kusi ong·tokengachim indiba da·o ia ramani mitam bakrango nosto ong·aniko nikon, ka·dongani dongja gita ong·aha,” ine AYC-ni membor Maxbirth Momin parakataha.
Kobor on·ani gitade, ia km 20-mang ong·gipa ramako tarina gita sorkari, gong kror 14-mangko chamatahachim aro ia kamko Tura-ni contractor-na on·ahachim.
Iani bidingo sing·sandiaton, ta·raken iani bidingo am·sandie ja·kurangko de·anggen ine a·dokni Chief Minister parakataha.
