SHILLONG: Them Iew Mawlong-o donggiparangko gipin biapona apjitatna am·gipani bidingo tarigiminrangko Committee-na A·dok Sorkarini watataniko Harijan Panchayat Committee sengenga.
Sonibaro koborna aganengon, sorkarini tarigipa lekkako ia ja bon·achi man·sona gita uamang ka·dongenga ine HPC Secretary, Gurjit Singh aganaha.
Nokrik nokdakani korosko gaman baksa nokdangprakna 200 sqm a·ako uamang dabiaha, uamang uamangna baikamgipa biapko sorkarioniko nichakenga, Singh aganaha.
“Chinga chingni bilna dakgrikenga aro chingni dabiani niam gitan ong·a aro chinga maming ong·gijakode bi·jaenga ine Deputy Chief Minister an·tangba aganaha” ine HPC Secretary aganaha.
Them Iew Mawlong-o donggiparangko apjitate gipin biapo dongatna gita tarisoenggipa kamrangko seng·gnange matchotchina gitaba Deputy Chief Minister, Prestone Tynsong, Urban Affairs department-ko ge·etatmanahachim.
Tarigimin blueprint chu·gimik lekkarangko Harijan Panchayat Committee (HPC)-naba mesokgen aro uni ja·mano sorkarini on·ako ra·chakgenma ra·chakjwa, HPC-ni chanchianio pangchakgen.
Kamrangko tik dakani ja·mano sorkari, HPC-ko agangrikna gita okamgen.
Da·o dongenggipa Them Iew Mawlong-ni palo HPC, acre sku a·arangko am·ahachim ine nikna man·a.
Unomitingo HPC-ni Shillong songjinmani European Ward-oniko acre sku a·ako dabienggipakode on·jachina gita pressure group-rang jegalskaeng ineba nikatna man·skaenga.
