RESUBELPARA: Adita salrangna skang, Meghalaya a·dok gimikon mikkarang jimbee waanganichi, North Garo Hills a·jani Resubelpara-o rikenggipa Damring dolong nosto ong·atako man·angaha.
Ia dolongko rikanio indinan somoiko ru·ute nangengahachim aro Sukrobar salo, mikkarang jimbee waanganichi ia dolongni mitam bakrang nosto ong·atako man·na nangtaiaha.
Sukrobar salo mikkarang jimbee waangani ja·man chi dal·bae, ia dolongni mitam tarigimin bakko pe·angaha aro da·o ia dolongko taridaptaianio bang·en somoiko nangdaptaignok ine kobor on·timgiparang parakataha.
Mikkarang jimbee waanganichi ia rikenggipa dolongni mitam bakrango be·srianirangkoba nikna man·aha ine kobor on·aha.
Ia dolongko rikmanahaode Resubelpara-oni dingtang dingtang biaprangona re·a doanio neng·nikanirang komignokchim indiba rasong gribee ia dolongko rikani matchotchipna man·kujaengachim.
Garo Hills-ni bang·bata biaprangon mikkarang jime waengani a·sel chirang dal·bana a·bachengengahani gimin chi sambao songdongenggipa manderangko mikrake dongchina sorkari u·iataha.