TURA: Manderangni galenggipa jabolrangoniko wa·al so·ani bostuko tariskana gita Mongolbar salo Meghalaya a·dokni Chief Minister Conrad K Sangma baksana Republic of Korea-ni Ambassador Chang Jae-Bok, Tura Rongkhon Songgital-o donggipa Tura Municipal Board (TMB)-ni jabol galchakgipa biapo Chamhana GW-Refuse Derived Fuel Plant-ni pilot project-ko kulie on·angaha. Korea-ni Ambassador baksana Lady Ambassador aro New Delhi-o donggipa Korean Embassy-ni official-rangba re·bae bakko ra·angaha.
Ia project-ara India a·songo skanggipa project ong·enga aro iako kulie on·angani somoio a·dokni Chief Minister, jinmana aganprakangengon, ia pilot project-ara ramram technology aro dam komiani project ong·a aro ian manderangni galgipa jabolrangoniko wa·al so·ani bostuko tarigipa karkana ong·ani gimin ia project-ko a·bachengataniara namen gisik ra·beani sal ong·gnok ine parakangaha.
2019 bilsio uni ia jabol galchakgipa biapko nieaniko gisik ra·atpilengon, ia biapo galenggipa jabolrangko ua maikai nambate nirokna aro maikai jabolrangko mandeni namgnina jakkalskana man·gen, uni gimin chanchiani ong·kataha aro uandaken Korea a·songni Chamhana company baksa nangrime, ia biapo da·o wa·al so·ani bostuko tarina karkanako kulina man·aha ine Chief Minister parakataha.
Ia karkanao plastic aro cha·ani jabolrangko wa·al so·ani bostu tarigen ine talataniko on·angengon, ia biapo galgipa jabolrangko skanggipa a·dubekoniko ma·ekatchengna nangengani gimin kamko ka·anio komibeoba ja 9-oni ja 12-mangkode nangkugen ine Chief Minister parakataha.
Ia apsan dakgipa project-ko ja·mano a·dokni Shillong, Jowai, Nongstoin aro gipin a·jarangoba kulianggen ineba Chief Minister parakataha.
Tura jillao jabolrangko ramarango aro chiringrango skatang galramramanian mongsonggipa ra·biani ong·enga ine janapatengon, dingtang dingtang gittimrango aro mongsongbate Tura Bazar jolrango skatang jabolrangko galaigija, mikkangchi jillako rongtal an·tale rakkina kam ka·anio Tura Municipal Board baksa nangrime jabolrangko name galchina aro an·tangtangni manderangna mikrakatanirangko on·china gita Chief Minister, dingtang dingtang gittimni development committee-rangko didiangaha.
Ia tom·anio Republic of Korea-ni Ambassador Chang Jae-Bok-ba jinmana aganprakangengon, salgro salaram a·dokrango ua skanggipa Tura jillaonan re·bachengaha aro ia biaprangara Korea a·song baksa apsanang ine parakangaha.
Tura-o Chamhana Fuel Plant-ko kulianichi mikkangchi skatang jabol gala grigipa jilla ong·atgen ineba ua an·tangni ka·dongchakenganiko parakangaha.
Ia tom·anio dongpae jinmana aganprakanggipa gipin manderangara, Chief Minister-ni Technical Advisor Naba Bhattacharjee, TMB-ni Chief Executive Officer Rikse R Marak, TMB-ni Chairman JD Sangma, TMB-ni Executive Engineer HPN Sangma aro gipinrang ong·a.
