TURA: South Garo Hills a·jani Gasuapara-o galgimin koelarangko Bangladesh a·songona salangna gita Jai Maa Coal Private Limited minggipa company-na permit on·aniko Shillong-oni Kingstone Bolwari minggipa mande saksa jegalatenba, South Garo Hills a·jaoniko ia company-ni koela salaniko inquiry dakchina aro nanga gita ja·kurangko de·china didiataha.
Iani bidingo a·dokni DGP, BSF-ni IG, Customs-ni Commissioner aro Gasuapara-o donggipa Customs-ni SP-na badi ka·e sedoatengon, Gasuapara-o chimonge dongipa koelarang dongja aro ia permit-chi ia company-ni manderang, South Garo Hills a·jao niam gri bikotenggipa koelarangkosa salskaenga ine Kingstone parakataha.
Kingstone-ni parakatani gitade, koelarangko salna gita April 28 tariko, Meghalaya sorkarini Under Secretary, M/s Jai Maa Coal Pvt Ltd-na permit-ko on·ahachim aro uni ja·man Gasuapara-o gale donenggipa koelarangko Bangladesh-ona salangna gita Deputy Commissioner, April-ni 29 tariko jegalgimin order-ko on·ahachim.
Koelarangko Bangladesh a·songona watatna gita gipin biaprangoniko Gasuapara Land Custom Station-ona salbana gitasa permit-ko on·aha ine sorkari a·kangengon, ia Jai Maa Coal Private Limited company, South Garo Hills a·jao niam gri bikotdaldalenggipa koelarangkosa salangskaenga ineba Kingstone matnangataha.
“Uamangni a·kangenga gita Gasuapara-o gale donenggipa koelarang dongja. Uni gimin ia manderangna koela salna gita permit-ko on·aniara South Garo Hills a·jao niam gri bikotenggipa koelarangko salnasa chol ong·skaenga,” ine Kingstone Bolwari parakataha.
Kingstone-ni parakatani gitade gipin a·dokrangoniko koela salbaenggipa garirangko aro koelarangko nirokenggiparang dongjani a·selan South Garo Hills a·jao niam gri koelarangko bikotna ka·dongbatenga aro ian sorkarina kajina man·anioba noksan ong·atako man·enga.