JOWAI: Bristibar pring 3:00 bajimango, Home Guard sipai saksani nokko bol pangsani dal·begipa cheksi nokkingo be·dapaha aro ia cheksi be·dapanio ua Home Guard sipai, so·otako man·aha.
Kobor on·timgiparangni u·iatani gitade, ia nokara GI-sheet-chi rikgipa nok ong·achim aro bolni cheksi ia nokkingko be·dapon, nokking be·pruangenba, ka·mao tusienggipa Home Guard sipaiko ga·akdapeaha.
Ia Home Guard sipai Premel Bamon-ara Jowai Traffic Police-o kamko ka·engachim aro ua somoio ua an·tangni Assam-type PWD quarter-o tusiengachim.
A·sel ong·anio Bamon sina gita nangaha indiba rasong gnange uni jikgipa aro bi·sade maming saknaani gri jokskaaha.
Batanggimin sal somoirangonin Meghalaya a·doko mikkarang jimbee waengani a·sel bang·a biaprangon bol be·anirangkoba nikna man·engachim.
Adita salrangna skangsan, Ri Bhoi a·jaoba autorickshaw bolsako bol dal·begipa be·dape, bi·sa saksa siangna gita nangahachim.
