Niam gri napsrukbagipa me·a bi·sako BSF sipairang, BGB-na pakwate on·ata

SHILLONG: India a·song ning·o ga·akgipa South Garo Hills a·jaona niam gri napsrukbagipa Bangladesh a·songni me·a bi·sa saksako Bristibar salo, Border Security Force (BSF)-ni sipairang, Border Guards Bangladesh (BGB)-na pakwate on·atpilaha.
A·song damgnini gisepo meli nangrime donganiko mesokna gita BSF-ni sipairang, niam gri napbagipa me·a bi·sako sasti on·gija, BGB-ni sipairangna pakwate on·atpilaha.
BSF Meghalaya Frontier-oni koborko on·ani gitade, Bangladesh a·songni bilsi 17 ong·gipa me·a bi·sa saksa Budbar salon, South Garo Hills a·jaona napbae, re·roroe dongengmitingko BSF-ni sipairang Bristibar salo rim·na man·ahachim.
Ia me·a bi·sako BSF sipairang, sing·sandion, uoniko maming bosturangko man·jaha aro uko Bristibar salon BGB-ni sipairangna pakwate on·atpilaha ine BSF official-rang parakataha.
BSF Meghalaya Frontier-ni official Inderjit Singh Rana-ni u·iatani gitade, BSF aro BGB dolgnian, iandakgipa obostarangko jako ra·anio ka·sachakaniko mesokgrike kamko ka·engachim.
“A·song damgnini gisepo meli nangrimaniko aro ka·donggrikaniko bilakbatatna iandakgipa obostarangko chinga dolgni nangrime namatna kam ka·rongenga,” ine Rana parakataha.

Get real time updates directly on your device, subscribe now.

Comments are closed.