TURA: East Garo Hills a·jao, gitcham Congress sorkarini a·bachengatgipa ramako, NPP-chi dilenggipa MDA sorkari, da·o term bon·angpilna siengahaoba matchotatchipgija donenga ine jolo songdongenggipa manderang matnangataha.
Jolo songdongenggipa manderangni parakatani gitade, Rongjeng-Mangsang-Adokgre ramako tarina gita 2017 bilsini June 19 tarikon gitcham Congress sorkari, gong kror 123.28 tangkarangko chamahachim indiba da·o ong·enggipa MDA sorkari, ia ramako matchotatchipgija donaiahachim.
Ia ramani bakroaniara kilometre 54 ong·achim ineba jolo songdongenggipa manderang parakataha.
Ia ramani bidingo Opposition dolni MLA Zenith Sangma, Assembly session-o a·dokni Deputy Chief Minister aro PWD (Roads) Minister Prestone Tynsong-o sing·doangani ja·man, jolo songdongenggipa manderang, ka·dongataniko man·tokahachim indiba da·o ia MDA sorkarina baditaba jarangsan dongaiahani gimin ian manderangna ka·dongani gri ong·ata gita ong·engaha ine jolni manderang parakataha.
“Assembly-o ia ramani gimin sing·doahani gimin chinga gimikan kusi ong·tokengachim indiba da·onan ia ramako matchotchipkujaenga aro je tarigimin ramarangba nosto ong·tokpilengaha,” ine jolo songdongenggipa mande saksa Chekam R Sangma parakataha.