TURA: North Eastern Hill University (NEHU) Tura campus-na dingtang dingtang dabianirangko chu·sokate on·na gita NEHU-ni Vice Chancellor, ku·rachakaniko on·ani ja·manoba da·onan ia dabianirangko chu·sokate on·kujaengani gimin Garo Hills-o dingtang dingtang dolrangni nangrime bikotgipa Joint Action Committee (JAC), jingjengatanirangko a·bachengpiltaina manchiangaha.
NEHU Tura campus-na gital pro vice chancellor (PVC)-ko songe on·china aro Tura campus-o kam ka·enggiparangna apsan dormahako on·china dabianirangko chu·sokate on·china dabienba, ia bilsini January jao JAC, NEHU Tura campus-ni mongsonggipa gate-ko chipe, jingjengatanirangko dakangahachim ine nikna man·a.
Ja·mano jingjengatenggipa JAC-ni dilgiparangko NEHU-ni VC, grongenba, ia dabianirangko chu·sokate on·na ku·rachakahani gimin jingjengatanirangko dontongatpilahachim ine nikna man·a.
Indake ong·engon, da·alona kingkingba NEHU Tura campus-na gital PVC-ko on·kujaengani gimin aro campus-o kam ka·enggiparangni dabianirangko chu·sokate on·kujaengani gimin JAC-ni gita jingjengataniko a·bachengpiltaina manchiaha ine kobor on·aha.
Sonibar saloba, Union Education Minister Dharmendra Pradhan-ni Meghalaya a·dokona re·baani somoio NEHU-o kam ka·enggiparang, an·tangtangni dabianirangko chu·sokatkujaengani gimin jegalanirangko dake mesokangahachim.
“NEHU-ni Vice Chancellor an·tangan, Tura campus-o nanganirangko chu·sokate on·na ku·rachakahachim indiba da·onan ua an·tangni ku·rachakako chu·sokatkujaenga. Chinga January jao uko grongahachim aro ua chingni dabianirangko chu·sokatna ku·rachakaniko on·ahachim. Indake ong·genchimoba, da·alonan chingni dabianirangko chu·sokate on·kujaengani gimin chinga gital dake jingjengataniko a·bachengpiltaina tik ka·aha,” ine JAC-ni member Zikku Balgra Marak parakataha.
NEHU Tura campus-ni pro-vice chancellor-na Tribal-rangoniko songchina, Tura campus-o A·chik aro Tribal chatro chatrirangna biaprangko on·chengchina, contractual basis kam ka·enggiparangko regularise ka·china, hostel, quarter aro uandakgipa building-rangko chu·onga gita rike on·china aro chatro chatrirangna namgni ong·nagipa gipin subject-rangkoba Tura campus-o a·bachengatchina gita NGO-rang dabiengachim ine nikna man·a.