TURA: Batanggimin salrango, West Khasi Hills a·jao donggipa Mallangkona songni manderangko, Assam-ni police-rang, songona re·bae dokkol ka·na jotton ka·ahani gimin ia jolrango songdongenggipa manderangna chel·chakanirangko on·china gita Garo Hills-ni FKJGP, ADE, FAF aro AYWO dolrang, Meghalaya a·dokni Chief Minister Conrad K Sangma-na sedoataha.
Ia dolbri NGO-rangni parakatani gitade, re·anggipa May-ni 23 aro 24 tarikrango, Assam-ni police-rang, Mallangkona songona re·bae songni manderangko dokkol ka·na jotton ka·ahachim.
“May-ni 23 tariko Mallangkona Salbari songni manderang, me·dik-sam·dikrangko aro chokki-table-rangko donchakna gita Salbari LP School aro Salbari Baptist gilja noko godown-ko rikengachim indiba uamangni godown-ko rikengmiting somoio Assam-ni police-rang re·baenba, da·o dipet ia biaprangara a·dok damgnini gisepo meligrikna man·kujaenggipa biap ong·ani gimin ia biaprango maming nokrangko rikna man·kujawa ine pa·sike songni manderangko champengeaha,” ine NGO-rang parakataha.
Iani ja·mano, Assam-ni police-rang chu peke, Mallangkona Garojan songona re·bae songni nokni manderangko skatang doke sate donangaha, jeon me·chik sakgittam aro me·asa sakdok saknaanirangko man·na nangaha ine NGO-rang parakataha.
“Ia a·selni bidingo am·sandianirangko dakon, badiaba mande saksani badi ka·aniko man·esa Assam-ni police-rang ua songona re·baahachim aro uamangni sing·sandianirangko dakengmiting somoio uamang, me·chikma saksako mi a·paloni ‘katchi’ ra·e re·baako niksoenba, uko skatang dokna a·bachengaha ine ma·sina man·aha. Songni gipin manderang ia me·chikmako dakchakna re·baon, Assam police-rang uamangkoba doke sate donangaha,” ine NGO-rang parakataha.
Gittamgipa a·sel ong·ani bidingo talate on·angengon, Dhupdhara bazar-ona re·anggipa paningsa sakgniko Assam police baksana All Rabha Students Union (ARSU)-ni mitam membor-rang, rim·aha aro da·alonan uamangko man·pilkujaenga ine NGO-rang parakataha.
NGO-rangni parakatani gitade, ua somoio Assam police aro ARSU-ni mitam membor-rang, Solen Sangma aro uni depante Ranbel Marak-ko uamangni Dhupdhara bazar-oniko bregipa matchu mangbonga aro gong 90,000 tangkarang baksa rim·ahachim indiba da·alonan uamangni gimin maming kobor dongkujaenga.
Ia a·selrangni bidingo a·dokni Chief Minister-na sedoatengon, Mallangkona Salbari jolrango songdongenggipa manderang iandakgipa neng·nikanirangko chagrongna nangrongenga ine NGO-rang parakatenba, ia songrango donggipa manderangna chel·chakanirangko on·china didiataha.
Mallangkona Salbari LP School aro Mallang Baptist gilja noko godown-ko rikna on·china, Assam police-rangni jako dokako man·e saknaa man·gipa manderangna tangka paisarangko gamchina aro ia jolrango Meghalaya Police-ni dolsa sipairangko donatchina gitaba NGO-rang, Chief Minister-ko didiataha.
Assam police-rangni rim·gipa Solendro Sangma aro uni depante Randel Marak-ko sandie on·enba, uamangoniko rim·gipa matchu mangbonga aro gong 90,000 tangkarangko uamangni nokdangna man·pile on·china gitaba NGO-rang, Chief Minister-ko didiataha.