AIPC-ni National Convention-ko matchotata

TURA: Re·anggipa May 26 tarikoni salgittamna ong·atanggipa All India Poetess Conference (AIPC)-ni chang 20 aro 21-gipa National Convention-ko Sonibar salo matchotataha.
AIPC-ni National Convention-ko North Eastern Hill University (NEHU) Tura Campus-ni Garo Department, A·chik Literature Society aro Delhi-ni Sahitya Akademi nangrimenba, Tura-ni Walbakgre-o donggipa Pastoral Centre-o ong·atangahachim aro ia National Mega Convention-ona Garo Hills-onisan ong·aigija India a·song gimikonin poedo serakgipa me·chikrang tom·chimongbatokbae bakko ra·angtokahachim. Ia tom·bimonganiona Karnataka aro Assam a·dokrangoni bang·bate sokbaahachim.
Ia AIPC-ni National Convention-ko matchotatani salo, MPSC-ni gitcham Chairperson aro ICFAI University-ni gitcham Dean Viola Sonatchi B Sangma, mongsonggipa sokgipa ong·e bakko ra·angskaaha.
Ia National Convention-ni bon·kamgipa tom·anio, dingtang dingtang biaprangoni re·bagipa manderang, an·tangtangni segimin poedo aro golporangko jinmana poraie on·angaha aro ia program-o uamangni git ring·anirangkoba nikangna gita man·aha.
Ia tom·anio AIPC-ni founder Professor Lari Azad-ba dongpae bak ra·angengon, ia salgittamna ong·atanggipa tom·bimonganiko name matchotatna man·ahani gimin ia program-ko ong·atgipa dolrangko aro tom·bimonganiona re·bae bak ra·gipa me·chik sakantikon mittelpilangaha aro chang 16-gipa AIPC International Convention-ko ia bilsini June jao, Greece, Rome aro Turkey a·songrango ong·atanggen ine parakataha.