SHILLONG: Ru·uta bilsi salrangna kuliako senge dongbeenggipa Crowborough Hotel-ko A·dok Sorkari re·baenggipa August 15 tarikna skangan nokdonggana gita miksongsoahachim, ia hotelko da·ode September jaosa nokdonggaskagnok.
Official saksa Mongolbaro u·iata je Hotel-ko nokrik nokdakani pilak kamrangkon August-o matchotatgen aro Hotel-ko September jao nokdonggaaniko dakanggen.
“Da·omitingo nokningni kamrangko ka·enga, uandake gipin kamrangkoba apsan somoion ka·enga,” official-rang aganaha.
Crowborough hotel-ko August 15-na skang nokdonggagen ine hotelko rikgipa contractor-na a·dok sorkari aganahachim.
Indake Taj Vivanta-ko, hotelko chalaichina aro hotel-ni pilak nanga kamrangko ka·china gita general manager dake songaha.
Ia hotel-o, sak 150 manderangko dingtang dingtang kamrango napatna man·gen, ia hotelo dingtang dingtang economy kutturirang, nambatgipa dringrang, deluxe room-rang, ale cha·ani dringrang, coffee dokkan ugita gipinrang donggen.
Unomitingo, Jail Road, Shillongo ge·gipin five star hotel-ko rikenggipaba chu·sokangengaha ine official-rang aganaha.
