AMPATI: World Environment Week-ko maniani bak gita Sukrobar salo, South West Garo Hills a·jani Malchapara songo jinma bolrangko ge·angtokaha.
Ia program-ko South West Garo Hills a·ani Divisional Soil & Water Conservation Office-ni gita Malchapara Multi Facility Centre-o ong·atangaha aro ia program-o Garo Hills Autonomous District Council (GHADC)-ni Executive Membor Stevie M Marak, mongsonggipa sokgipa ong·e bakko ra·angaha.
World Environment Week-ko manianio South West Garo Hills a·jani damgittam C&RD Block-rangon Soil & Water Conservation department-ni gita songni manderang baksa nangrime bolrangko ge·na sienga aro ia program-ni bak gita Sukrobar salo Malchapara songoba bolrangko ge·angaha.
Official-rangni u·iatani gitade, South West Garo Hills a·jani damgittam block-rango bite nanggipa bolrangko ge·na gita gimik hectare 100 a·arangko tik ka·e donmanaha aro ia hectare 100-oni hectare 30-de Rerapara block-o, hectare 35-de Betasing block-o aro hectare 35-de Zikzak C&RD Block-o ong·enga.
Ia program-ko ong·atanio GHADC-ni EM aro Boldamgre-ni MDC Stevie Marak, jinmana aganprakengon, ia salo ge·anggimin bolrangko name niroke dal·atchina songni manderangko aro dingtang dingtang dolrangko didiangaha. Bolrangko ge·anio dingtang dingtang songni manderangkoba bak ra·china didiangengon, mikkangchi iandakgipa kamrango skul aro college-rango poraienggipa chatro chatrirangkoba bak ong·atchina Marak didiataha.
Ia program-ko ong·atahani gimin Soil & Water Conservation department-ko mittelpilangengon, bolrangko ge·na gita songni hectare 5 a·arangko on·ahani gimin Marak, dingtangmancha Malchapara songni Nokmakoba mittelpilangaha.
Indake ong·engon, Meghalaya a·dok gimikon ia anti gimik World Environment Week-ko manitokengani gimin South West Garo Hills a·jaoba District Administration baksana MBMA-CLLMP nangrime, bol ge·ani program-rangko aro dingtang dingtang program-rangko salrango ong·atenga ine kobor on·aha.
Sukrobar salo, ia World Environment Week-ko maniani bak gita debate, essay sesusaani aro noksa salsusaaniko Ampati-ni Mothers Union School-o ong·atangaha, Bristibar salo Ampati jolo donggipa Kumli pokkri jolrango bolrangko ge·angaha aro Sonibar salo DC office complex-o bolrangko ge·na sienga ine kobor on·aha.
