Tura NYK-ni gita World Bicycle Day-ko manianga

TURA: Azadi Ka Amrit Mahotsav-ni bak gita Sukrobar salo, World Bicycle Day-ko Tura-o maniangaha aro ia program-ko ong·atanio West Garo Hills a·jani Additional Deputy Commissioner Winje RG Momin, mongsonggipa sokgipa ong·e bakko ra·angaha.
Ia World Bicycle Day-ko Tura-ni Nehru Yuva Kendra (NYK) Sangathan, West Garo Hills a·jani District Administration baksa nangrime manidilangaha aro ia program-o West Garo Hills a·jani Deputy Superintendent of Police (DSP) Krisson R Marak-ba dongpae bak ra·angaha.
Cycle-ko salanichi mandeko an·seng baljoke rakkian baksana samtangtango ong·telaigiparangnaba namgniko ra·bana man·ani gimin cycle salaniko ranta ka·china gita ia World Bicyle Day-ko a·gilsak gimikon manirongenga ine nikna man·a.
Ia salko manianio Bicycle rally-ko ong·atangaha, jeon bakko ra·gipa manderang, William Point-oni a·bachenge, Ringre-Mission Compound-Chandmary kal·chakram gita salange, William Point-o matchotatpileaha.
Cycle rally matchotani ja·mano, ADC Winje RG Momin aro DSP Krisson R Marak-ni jakchi, cycle rally-o bak ra·giparangna certificate-rangko suale on·angaha.
Ia program-ko ong·atanio dongpae bakko ra·anggipa gipin manderangara, Tura NYK-ni Deputy Director LBK Sangma, A·we Pedallers-ni president Changgrik M Sangma, NYK-ni volunteer-rang aro gipinrang ong·a.