SHILLONG/TURA: Re·anggipa anti a·bachengaonin Meghalaya a·doko World Environment Week-ko manitokengon re·anggipa Sonibar aro Robibar salrangoba, a·dokni dingtang dingtang biaprango World Environment Day-ko maniani bak gita bolrangko ge·an baksana dingtang dingtang program-rangko ong·atangaha.
East Jaintia Hills a·jao ia World Environment Day-ko maniani bak gita Kyrhuhkhla aro Lunar chiringrangko tangatpilani project-na dingtangmancha pangchakaniko a·dokni Forest & Environment Minister James Pangsang K Sangma-ni jakchi Khliehriat West-ni Umsyllih-o songe on·angaha aro ia apsan salon ua, Khliehriat East-ni Pohskhen-oba koela bikotanichi nosto ong·gimin biaprango bolrangko ge·ani project-koba a·bachengate on·angaha.
World Environment Day-ko maniani bak gita, Shillong songjinmani Lumparing Mynsain-o ‘Greenery Children’s Park’-ko Meghalaya a·dokni Arts & Culture Minister aro jolni MLA Sanbor Shullai, kulie on·angskaaha.
Shillong songjinmani NEIGRIHMS-oba World Environment Day-ko maniangaha aro ia manianio NEIGRIHMS-ni Director Prof Nalin Mehta, Medical Superintendent Prof C Daniala, Sanitation Officer Debal Kumar Das aro institute-ni dingtang dingtang officer-rang bakko ra·angenba, Institute-ni Herbal Garden-o bol chararangko ge·angaha.
Tura-o ia World Environment Day-ko CAU-ni ning·o donggipa Community Science College-oba maniangaha aro ia manianio West Garo Hills DRDA-ni Project Director Mary T Sangma, mongsonggipa sokgipa ong·e bakko ra·angaha. Ia tom·anio ua college-ni official-rang, skigiparang aro chatrirangna aganprakengon, ia World Environment Day-ni nangchongmotgipa ong·ani bidingo talataniko on·angenba, bolrangko ge·daprorochina aro an·tangtangni ge·enggipa bolrangko simsak niroke dal·atchina chatrirangko didiangaha.
Ia tom·anio West Garo Hills a·jani DFO (Social Forestry) Dimse K Sangma-ba dongpae jinmana aganprakengon, samtangtango donggipa buring bolgrim, chiring chibisik, do·o-mat aro pilak ong·telaigiparangkon ripinge rakkichina didiangaha.
Ia salko manianio Community Science College-o poraienggipa chatrirang, dingtangmancha college campus-ko rongtalataha aro ja·mano bite nanggipa bolrang, jekai letchu, te·brong, te·gatchu, olive aro uandakgipa dingtang dingtang bolrangko jinma ge·angaha.
South Garo Hills a·jaoba ADE Gasuapara regional unit, NRLM, Bakdil, CLLMP aro self help group (SHG)-rang baksa nangrime World Environment Day-ko Dimapara songo maniangaha aro ia salko maniani bak gita bolrangko ge·angaha.
Indake ong·engon, Sonibar salo Soil & Water Conservation department-ni gita Rongram C&RD Block baksa nangrime World Environment Day-ko Sasatgre songo maniangaha aro ia salko manianio gital rikgipa RCC check dam-ko North Tura-ni MLA Thomas A Sangma-ni jakchi oprake on·angjolaha.
Ia dam-ara NABARD-ni dakchakanichi Soil & Water Conservation department-ni Sasatbol Rural Infrastructure Development Fund project-ni ning·o rikgipa dam ong·achim.
Ia tom·anio North Tura-ni MLA jinmana aganprakengon, World Environment Day-ko maniani bidingo jinmana talate on·angenba, mandeni janggira a·gilsakni tanganiosa pangchakgipa ong·a ine parakangaha.
Mandeni dakgualani a·sel a·gilsak bon·na nanggenchimode mandena gipin a·gilsak dongjaha ineba ua an·tangtangni samtangtango ong·telaigiparangna simsak nirokchina mikrakataniko on·angaha.
Ia salko manianio dongpae jinmana aganprakanggipa gipin manderangara, West Garo Hills a·jani Deputy Commissioner Swapnil Tembe, Rongram C&RD Block-ni BDO MR Marak aro gipinrang ong·a.
Ia salko manianio Sasatgre songo pang 500 bol chararangko ge·angaha.