SHILLONG: Niam gri koela badinganina rim·ako man·gipa Assam-ni mande baksa Meghalaya a·dokni Health Minister James PK Sangma jak donga ine matnangenggipani bidingo kakketko talate on·china gita Meghalaya Pradesh Congress Committee (MPCC)-ni president Vincent H Pala, a·dok sorkario dabiangaha.
“Iandake matnangenggipani bidingo sorkari talataniko on·na nanga aro manderangna kakket ong·aniko mesokna gita inquiry-ko dakatna nanga,” ine Pala aganaha.
Niam gri koela badinganina ia bilsini February jao, Assam Police-ni jako rim·ako man·gipa Balwant Soni ba Bhama minggipa mande baksa Meghalaya a·dokni minister James Sangma, jak donga ine Assam-ni news channel-o parakatahachim.
“James-ni bimingko Guwahati-oni media-rang biming mingaha aro ian kakket ong·ama ong·ja chingade ma·sija indiba ua an·tangan iani bidingo talate on·na nanga,” ine Pala aganaha.
Iandake matnanganirangara kakket ong·ja ine nikenga ong·ode sorkari, ia media-ni kosako ijahar ka·na man·achim indiba iani bidingo sorkari mamingkoba dakjaenga ong·ode uan maibade ong·jaenga ineba MPCC-ni president parakataha.
Chief Minister an·tangan mining-niba in-charge ong·engachim ine janapatengon, iani bidingo ua kakketko ma·sina gita sandianirangko dakna nangachim ine Pala aganaha.
An·tangni kosako matnanganirangko a·dokni gitcham home minister James Sangma-de jegalatskaahachim ine nikna man·a.
“An·ching sakoba iandake matnangengon, sakkirangkoba mesokna man·na nanga. Matnanganirangkode an·ching gimikchin nikna man·enga. Anga an·tangde video-ko nikkuja indiba ian angni bak ong·pagijagipasa ong·enggen ine anga namen ma·sia. Ian matnangmangmangni kamsan ong·aigen,” ine James Sangma aganahachim.
Ia video-ni ong·kattaiahani gimin sing·on, da·o election-ni somoirang sepangengahani gimin maming pangchakani gri matnanganirangkode nikna man·aigen ine Sangma parakatahachim.