SHILLONG: Opposition AITC-ni dilgipa Dr Mukul Sangma, skango chief minister-ni biapko man·na kragipa ong·genchimoba 2023 bilsini Assembly election-ni ja·manode CM-ni biapo asongenggipa mandena chakpagipasan ong·aignok ine Robibar salo, Rajya Sabha-ni MP aro NPP-ni state president Dr WR Kharlukhi a·kangataha.
“Skangode Dr Mukul, CM-ni kamko man·ani cholrang dongaiachim indiba 2023 bilsini election ja·manode ua CM ong·enggipa mandena chakpagipasan ong·aignok ine anga namen ma·sia. Congress-ode ua singhasono asongani cholrang dongachim indiba TMC-ode ua gipinna chakpagipasan ong·aignok,” ine Kharlukhi parakataha.
Meghalaya a·doko NPP-chi dilenggipa MDA sorkariko AITC matnangrongengani gimin ua ia kattarangko aganskaaha.
“Ua Congress dolo ong·kugenchimode 2023 bilsio CM ong·piltaiani cholrang dongachim,” ineba NPP-ni state president aganaha.
Kharlukhi-ni parakatani gitade, batanggimin chang election-o Congress dolde ge 20-21 seat-rangko cheachim indiba TMC-de da·o ge 10-mangkosan cheainaba gnang aro ian TMC-na namen ong·na amgijaniba ong·engachim.
NPP-ni kosako matnanganirangchi election-o uamangna maming nangchakeanirangko ra·bajawa ine talatangengon, damgittam constituency-rango by-election-ko ong·atna skangba manderang NPP-ko mikcheptokachim indiba uamang chu·sokgipa ong·na man·aiaha ine Kharlukhi parakataha.