SHILLONG: Meghalaya a·dokni Chief Minister Conrad K Sangma-ni South Tura constituency-o ramarang namjani gimin All India Trinamool Congress (AITC), Chief Minister-ko matnangataha.
South Tura constituency-o college-o poraienggipa chatro chatrirangni rama tarianirangko nikani ja·man AITC-ni dilgiparang, Chief Minister-ko matnangataha.
South Tura constituency-o ramarang namjani gimin sorkariko matnangatengon, “Ia ramara GHADC-ona dakanggipa district council-ni rama ong·a aro ia ramani obosta namsrangjahani gimin Tura Government College-o poraienggipa chatro chatrirang, an·tangtangsa tarina nangaha,” ine AITC-ni dilgiparang parakataha.
Ia ramako chatro chatrirangni tarianiko niksoani ja·man AITC Meghalaya, noksarangko social media-o mesokatenba, sorkarini kamna raken jegalanirangko dakatahachim.
“Ia district council-ni ramara Chief Minister Conrad Sangma-ni constituency-o ga·akgipa ramaan ong·a aro ia rama nosto ong·ani ja·manoba tarie on·anirang dongjani gimin Tura Government College-ni chatro chatrirang an·tangtangsa tarina gita nangaha. Iandakgipa sorkarini kamrangara manderangna simsakgijaniko mesokani ong·enga,” ine AITC, social media-o parakataha.
Garo Hills-o skangonin rama jal·langrang namjani gimin manderang matnangtokenga aro chief minister an·tangni constituency ning·o donggipa rama jal·langrangkon tarina gita gisiko nangjaenga ineba AITC-ni dilgiparang parakataha.