TURA: Batanggimin salgnina joljol mikkarang dongtonggija waangani ja·man, West Garo Hills a·jani a·kawe jolrango aro mongsongbate Selsella C&RD Block-ni ning·o donggipa bang·a biaprangon chi dal·bana a·bachengengahani gimin District Administration, mikrakataniko on·angaha.
Koborko on·ani gitade, salgnina joljol mikkarang dontonggija waangani ja·man, West Garo Hills a·jani a·kawe jolrango aro mongsongbate Garobadha-oni Selsella-ona dakanggipa ramarango chirang dal·bae ramarangko mripna a·bachengahachim.
Iandake, mi a·palrango, manderangni nokrango aro rama dilmarang chi mripna a·bachengahani gimin Sombar salo, West Garo Hills a·jani District Administration, dingtangmancha mikrakataniko on·angenba, pilak department-ni official-rangkon tarie dongchina ge·etaniko on·ataha.
“Chinga chingni manderangko chi dal·baenggipa biaprangona watataha aro relief centre-rangkoba sandina a·bachengataha. Da·o chirang dal·baengahani gimin manderang pilakkon chiring ba uandakgipa biaprangoni chel·e dongchina didiatenga,” ine West Garo Hills a·jani Deputy Commissioner Swapnil Tembe parakataha.
Koborko on·ani gitade, Deputy Commissioner an·tangan a·kawe jolrangona re·ange an·tangni official-rang baksa obostarangko nieani ja·man, ia jolrango mikrake dongchina u·iataha.
Indake ong·engon, Phulbari, Rajabala, Chibinang aro uandakgipa biaprangoba chirang dal·bana a·bachengengaha indiba da·o dipet kenjagokna nangani dongkuja ine official-rang parakataha. Ia jolrangoba official-rang obostarangko nirikkienga aro nangani kri ja·kurangko de·anggen ine kobor on·aha.
Salgnina mikka waangani ja·man Selsella jolrango chi dal·bana a·bachenga
Date:
Share post:
