SHILLONG: Election-na skang skang, A·dok Congress-na minggipin sin·jetani sokbataijok, jeon gitcham Home Minister aro party dilgipa, HDR Lyngdoh mijalo party-oni ong·kataha.
Party president, HDR Lyngdoh-ni uni chittio janapani gitade, uni Congress-oni ong·katna chanchianiara, una chakgiparangoni 99.9 percent-an, uko Congress-oni susaaniko nangnikjaha, indiba uamangni nangnikgipa party-onisa susaaniko nangniktokaha.
Indake ong·genchimoba, manderangna ru·uta somoirangna dangdike on·na gita cholko on·ahani gimin aroba chubata gadangona uko ra·doani giminba ua Congress-ko mittelaha.
Indake da·sikkari November jaonin, bang·a Congress dilgiparangni party-ko wate kattokenganiko nikna gita man·enga.
Meghalaya Congress-o a·bachengode sak 17 legislator-rang dongachim, indiba uamangoni katrotrotenba da·ode sak 5 sanjok, aro uamangkoba party-oniko a·rikalsrangaha, jemangan da·ode gipin party-rangonisa election-o susatokna nidingenga.
