SHILLONG: A·doko National Law College-ko kulina gita de·e pinnikgipani bidingo A·dok Cabinet ru·utgijan tom·e chanchigen ine Law Minister James PK Sangma mija Mongolbaro aganaha.
“A·doko, National Law College-ko kulina gita de·a minganirangko dakmanaha, jeni bidingon ru·utgijan Cabinet-o chanchigen. Iani bidingo ru·utgija somoirangni gisepon chanchirimaniko dakna man·gen aroba ia a·bakuna ja·ku de·chakkatna man·gen ine chinga ka·dongenga,” Pa Sangma aganaha.
“Meghalaya, lekka bidako ski-ra·chakram biap damsa ong·a aro National Law College dakgiparangko kulidapatna man·genchimode, lekka bidani a·bako tang·dobatatgen,” Minister aganaha.
Iana banobarang a·arangkode nie donmanjokma ine sing·engon, “iana bang·en de·e pinnikgiminrang donga, uarangonikon damsako basena nanggen. Biap sandianiode maming neng·ani dongjawa ineba ua aganaha.
Indakeba nikatna gita man·gen je, ia a·bakuni bidingo bakrime kamrangko ka·na gita, a·dok sorkari, re·anggipa April jaon Bengaluru-ni National Law School of India University (NLSIU) baksa ku·monggrikaniko dakahachim.
PA Sangma Fellowship for Legal and Policy Research, NLSIU-ni chatro chatrirangko Meghalayao research activities-ko dakna cholko on·gen.
