TURA: Garo Hills Autonomous District Council (GHADC)-ni bimingo tangka gildrae ra·a ine Tura MDC-ni matnangenba, Reserve Gittim-ni adita sak manderangni kosako FIR ka·aniko Reserve Gittim Development Committee Zone-III-ni dilgiparang jegalatenba, Reserve Gittimo songdongenggipa manderangba GHADC-ni niamrangko ma·sigipa ong·e gittimtango songdongenggipa manderangoniko tangka gile ra·na man·ja aro iandake matnanganiranga tol·e matnanganirangsan ong·aia ine talataniko on·angaha.
“GHADC sako tangka gile cha·kan agana? Challan ka·e office-o kamna nanga ine pilakan ma·sia, na·a saksasan ia niamrangko ma·sigipa ine na·ara chanchiama? Chingaba GHADC-ni ning·o songdong a·chagiparangan ong·e niamrangko name ma·sia aro gong 2500-oni gong 5000-rangko gildrae ra·enga ine nang·ni matnanganiara namen ong·srangja. Chinga tangka paisarangko gittimni nanganirangnade gilgen, uarangkoa nang·nara maina nanga? Je tangka paisarangko gittimni gita gilenga, uarangba general meeting-o jinma resolution pass ka·esa jinmani namnikani gita development committee gilaniko dakenga. Jinmaan gilna namnikahaode sako maina darange gilna nangkugen?” ine Reserve Gittim Development Committee (RGDC) Zone III-ni secretary P Ch Marak, Tura-ni MDC Bernard N Marak-o sing·doangenba, India a·songara democratic a·songsa ong·e darangba darangkoba drana bil dongja aro iako pilakan namen ma·sia ine parakataha.
Reserve Gittimna GHADC-ni patta tarie ra·china on·aniko man·e a·arangko tona a·bachengon, Tura-ni MDC Bernard Marak, gittimni a·a togniko GHADC-na complain ka·aha aro office-ni mondol aro kananggo-ni re·baaniko champengataha ineba RGDC Zone-III-ni dilgiparang matnangataha.
“Reserve Gittimni a·arangara nang·ni a·ama? Iako daknara na·ara sawa? Na·ara Tura gimikni Nokma ine an·tangko chanchiama? Tura-ni MDC ong·e an·tangni ning·o donggipa gittimni manderangko FIR ka·e roanichi nang·nara mai rasongko ra·bagen?” ineba RGDC Zone-III-ni secretary sing·doatenba, name dake chanchigipa ong·genchimode MDC ong·e ua iandakgipa kamrangko namatnasa kamko ka·genchim ine parakataha.
Sillanggre ine biming donggipa gittimni manderangoniko tangka gildrae ra·enga ine MDC-ni matnanganikoba RGDC Zone-III-ni dilgiparang jegalataha aro uamangoniko tangka gilna skang uamangde Reserve Gittimoni chel·sranggipasa ong·a ine talataniko on·angaha.
“Jeko dakna skangba name tale ma·sie ra·chengbo. Saniba tol·mikmikana aro agananina mikkang janggil chanchichenggija dakbingbangaiani ong·ja. Na·a saksa dilgipa ong·e jatna aro a·songni namgninasa kamko ka·na nanga aro elakatangni manderangna ka·sagipasa ong·na nangachim,” ine RGDC Zone-III-ni secretary parakataha.
Tura MDC-ni FIR ka·anio mande sakbriko biming minggipaoni Nongjing K Sangma minggipa mandeni bimingko ra·chapaninaba RGDC-ni dilgiparang jegalataha aro da·o dipet Reserve Gittimo iandakgipa mandeba dongja aro bimingba dongja ine talataniko on·angaha.
Indake ong·engon, Tura Circuit House-ni a·palo donggipa a·ana pattarangko tarie ra·na gita District Council-ni officer-rangna ku·mitdu on·aha ine matnangenba, uni kosako FIR ka·ahani gimin Tura Dakopgre-o donggipa saksa Marbline R Sangma-ba Tura-ni MDC Bernard N Marak-ni kosako raken jegalataha.
“Ia biapo anga chengonin a·a donggipa mande ong·a aro iana anga GDC-ni official-rangna ku·mitduko on·na nangani kattaba dongja. Angni kosako iandake matnanganiara maming pangchakani gri matnanganisan ong·aia aro ian kakketgipa ong·ja,” ine Marbline R Sangma parakataha.