SHILLONG: Meghalaya a·doko niam gri koela bikotani aro salruraaniko skangonin jegalenga aro mikkangchiba jegalangkugen ine NPP-chi dilenggipa MDA sorkario bak ong·paenggipa People’s Democratic Front (PDF) parakataha.
Manderangni nanganirangna PDF pangnan ku·rangko on·gipa dol ong·a ine janapatengon, batanggimin somoirangoba a·doko niam gri koela bikotani aro salruraaniko uamang raken jegalenga aro mikkangchiba a·dokna noksan ong·atenggipa kamrangko jegalangkugen ine PDF-ni president Banteidor Lyngdoh parakataha.
A·doko niam gri koela badinganirangna a·dok sorkariko matnangtokengoba PDF dolde maming bak dongpaja ine janapatengon, “Sorkarini kosako matnanganirangna PDF-de maming nangchakeaniko man·jawa. Chinga je portfolio-koba man·genchimoba namen kamtangtangko chu·sokataha. Iandakgipa kamrangni bidingo chinga Cabinet-o aro coordination committee baksaba agangrikna jotton ka·aha,” ine Lyngdoh aganaha.
Niam gri koela badinganina rim·ako man·gipa Assam-ni koela badinggipa baksa Meghalaya a·dokni minister James Sangma-ba jak donga ine Assam-o media-rangni parakatgipa kattarangni gimin janapatengon, iani bidingo a·dok sorkari aro mongsongbate chief minister an·tangan jako ra·e am·sandichina ine PDF-ni president parakataha.
“Matnangmangmangaiachide kam ong·jawa, sakkirangkoba mesokna nanga. Iani bidingo chief minister an·tangan am·sandina nambatgipa mande ong·enga,” ine Lyngdoh aganaha.
 |
ReplyForward
|
