TURA: Tura-o smart town project-rangko register ka·gijagipa contractor-rangnasa on·ani a·sel kamrang niam gita ong·jaenga ine Tura-ni MDC Bernard Marak matnangatenba, gittimtangtango ka·enggipa kamrangko name nirokchina dingtang dingtang gittimni development committee-rangko didiataha.
Marak-ni parakatani gitade, smart town project-rangko loan gitasa sanction ka·ahachim indiba kamrangko register ka·gijagipa contractor-rangnasa on·skaahani a·sel kamrang namjaengani gimin bang·bata gittimrangon badi ka·dotokengahachim.
“Ia smart town-ni kamrangko name nirokjagenchimode gittimnasa noksan ong·aigen aro kamrangko estimate ka·gimin gita matchotatjagenchimode korosrang indin ong·gramaigen,” ine Marak parakataha.
Contractor-rangni kamko name nirokchina gita dingtang dingtang gittimni development committee-rangko didiatengon, kamrangko somoi gita matchotatchina aro contractor-rangni final bill-ko okna skang gittimni manderangsa certify ka·china gita Tura-ni MDC didiataha.
Ia kamrangara loan-chi ka·atenggipa kamrangsa ong·a ine talatangengon, ia loan-ko chotpilani daitode 2023 bilsini election-ni ja·man gital rikgipa sorkarini jakosa ong·gnok ine Marak parakataha.
“Uni gimin kamrangko name nirokchina anga development committee-rangko mol·molna ska. Ia kamrangko gittimtangtangni development committee-rangnasa on·china anga an·tangde nangnikachim. Angni RTI ka·e man·ani gitade, kamko man·gipa bang·bata contractor-rangan kam ka·e nikkugijagipa aro register ka·gijagipa contractor-rangsa ong·a,” ine Tura-ni MDC parakataha.