TURA: Dalu constituency-ni gitcham MLA aro changgittamna MDC ong·anggipa Kenethson R Sangma, re·baenggipa 2023 bilsini Assembly election-o susana gita Congress doloni ong·kate United Democratic Party (UDP)-o napangskaaha.
Koborko on·ani gitade, Dalu-ni gitcham MLA baksana Congress dolna kam ka·enggipa sak 270 membor-rangba UDP-o napangaha.
Congress doloni ong·kate UDP-o napangani bidingo talataniko on·angengon, re·baenggipa 2023 bilsini Assembly election-o UDP dolan bang·bate seat-rangko cheenba sorkariko dilna sienggipa dol ong·a ine ua niksamsoahani giminsa UDP-o napangaha ine Dalu-ni gitcham MLA Kenethson Sangma parakataha.
UDP dolara Garo, Khasi aro Jaintia manderangni, Tribal-rangni bilko warachakna, a·doko tom·ani aro namroro silroroaniko ra·bana bikotgipa dol ong·ani gimin a·doko UDP dolmangmangsan Tribal-rangni namgnina kamko ka·gipa dol ong·a ineba Sangma parakataha.
“National party-rangde vote-ko man·namangmang tangka paisarangko jakkale an·ching Tribal manderangko cha·bokenggiparangsa ong·a. Uni giminsa anga national party-oni ong·kate Tribal-rangni namgnina kam ka·enggipa UDP-o napskaaha,” ine Sangma parakataha.
Election-ni somoirango tangka paisana, gam-jinrangna aro ma·manti bosturangna mikboke dilgipako seokjachina indiba namgipa dol aro mandekosa seokchina gitaba Dalu-ni gitcham MLA, manderangko didiataha.
2023 bilsio ua Dalu constituency-oni UDP-ni tikito susagen ineba Kenethson Sangma parakataha.