TURA: Mongolbar salo, World Blood Donors Day-ko Tura Baptist Mondolini ning·o donggipa Mason Philips Hall-o maniangaha.
Ia program-ko Meghalaya Aids Control Society, Tura Civil Hospital-ni Blood Centre-o donggipa State Blood Transfusion Council aro Krima No. IV Youth-ni gita nangrime ong·atangaha aro ia program-ko ong·atanio West Garo Hills a·jani Deputy Commissioner Swapnil Tembe, mongsonggipa sokgipa ong·e bakko ra·angaha.
Ia program-ko ong·atanio Deputy Commissioner, jinmana aganprakangengon, an·chirangko on·gilna nangani gimin aganangenba, manderang an·chirangko on·gile, an·chi nangenggipa manderangko jokatna man·na gita iandakgipa an·chi on·gilani program-rangko ong·atjringna nanga ine didianiko on·angaha.
College-rangoba iandake an·chi on·gilani program-rangko ong·atchina didiangengon, an·chirangko on·gilani bidingo bang·bata manderangan ma·sisrettokengani gimin an·chirangko on·gilani bidingo manderangna agan-talatanirangkoba on·na nangenga ine Tembe aganaha.
Ia program-ko ong·atanio Deputy Commissioner an·tangba an·chiko on·gilangaha aro an·chi nangenggipa manderangni janggiko jokatna gita an·tangtangni an·chirangko on·gilchina an·seng baljoke dongenggipa manderangko didiangaha.
