TURA: International Domestic Workers Day-ko maniani bak gita Bristibar salo, State Level Convention-ko Tura Dakkopgre-o donggipa SMELC building-o ong·atangaha aro ia program-ko ong·atanio Tura-ni MP Agatha K Sangma, mongsonggipa sokgipa ong·e bakko ra·angaha.
Ia tom·anio Tura-ni MP, jinmana aganprakangengon, ia program-o donge bakko ra·anichi ua nokrango kam ka·e cha·enggiparangni neng·nikanirangko ma·sina man·aha aro Parliament-ni Monsoon Session-o ua National Policy of Domestic Workers Act-ko pass ka·china ra·angna jotton ka·gen ine parakangaha.
India a·songo Domestic Worker-rangko see rakkigipani gimin janapatengon, India a·songo million 4.7-na baten me·chikrang nokrango kam ka·e cha·enggiparang ong·e kam ka·giparangoni bang·batgipa ong·enga ine talatangenba, nokrango kam ka·enggiparangnaba identity-ko on·na nangenga ine parakangaha.
Badiaba somoirangode noko kam ka·e cha·enggipa manderang onchepako aro kal·ake roanirangko man·enga ine janapatengon, domestic worker-rangna on·gimin bilrangni gimin manderangna ma·siate on·na gita awareness program-rangko ong·atchina, dingtang dingtang department-rangko Agatha didiangaha.
Ia program-ko ong·atanio dongpae jinmana aganprakanggipa gipin manderangara, Tura-ni Bishop Rt Rev Andrew R Marak, West Garo Hills-ni Deputy Labour Commissioner Olivia Momin, District Social Welfare Officer Hemaritha Sangma, MBOSE-ni gitcham Assistant Director Giribala G Momin aro gipinrang ong·a.
