M’laya a·doko mikkarang waanichi gong kr 300-mangni gita noksan ong·a

SHILLONG: Meghalaya a·doko mikkarang dontonggija waanganichi chirang bananio aro a·arang be·anio gimik gong kror 300-mangni gita noksan ong·atako man·aha aro iana a·dok sorkari, ma·mong sorkarioniko dakchakaniko bi·ataha ine u·iataha.
East Jaintia Hills a·jao mikkarang waanichi a·arang be·aniko aro rama jal·langrangni nosto ong·aniko nina gita Robibar salo a·dokni Chief Minister, dingtang dingtang department-ni official-rang baksa re·angaha aro ja·mano ua, a·jani Deputy Commissioner aro dingtang dingtang department-ni officer-rang baksa tom·e chanchirimanikoba dakangjolaha.
East Jaintia Hills a·jani official-rang baksa tom·ani ja·mano kobor ra·timgiparangna talataniko on·angengon, mikkarang jime waanichi a·doko noksan ong·anirangko sorkarini hisape nianio gong kror 300-mang ong·aha aro iana a·dok sorkari, dingtangmancha Home Affairs Ministry-na sedoatenba, tangka paisarangko dakchake on·atchina ma·mong sorkariko mol·molataha ine Chief Minister parakataha.
Chief Minister-ni parakatani gitade, mikkarang dontonggija waanganio bang·en rama jal·langrang nosto ong·atako man·ahani gimin ia rama jal·langrangko taripiltaie on·na man·na gita nangrime kamko ka·china aro neng·nikanirangko man·enggipa manderangna nangchongmotgipa bosturangko suale on·china gita, ia tom·anio ua dingtang dingtang department-ni officer-rangko didiangjolaha.