SHILLONG: Ma·mong sorkarini chamatgipa tangka paisarangko jakkalsretan baksana a·dokni damgittam Autonomous District Council (ADC)-rango koros ong·ani account-rangko rakkijaengani gimin aro a·dok sorkari ia ADC-rangni kosako maming ja·kurangko de·jaengani gimin, ADC-rangko dal·e ra·chajachina aro niamrangko ja·rikjaenga ong·ode ADC-rangna tangka wataniko dontongchina gita All India Trinamool Congress (AITC), a·dok sorkariko didiangaha.
Iani bidingo talataniko on·angengon, a·dokni damgittam ADC-rangni kosako ja·kurangko de·na skang, a·dok sorkari uamangna mikrakataniko on·chengna nanga ine Meghalaya a·dokni AITC dilgipa George B Lyngdoh parakataha.
“Mikrakataniko on·ani ja·manoba, district council-rang maniteljagenchimode, rakgipa ja·kurangko de·na nanga aro ADC-rangona re·angenggipa tangka paisarangkoba dontongatna nanga,” ine Lyngdoh parakataha.
Special Assistance Grant (SAG)-ni ning·o ma·mong sorkarini chamatgipa tangka paisarangko jakkalsreta ine audit ka·e man·gipani bidingo Garo Hills Autonomous District Council (GHADC) aro Jaintia Hills Autonomous District Council (JHADC)-rang aganchakaniko on·kujaengani gimin aro damgittam ADC-rango korosrangko hisap rakkijaenga ine Comptroller and Auditor General (CAG)-ni parakatahani gimin ia kattarangko AITC-ni dilgipa aganaha.
Kamtangko name ka·na man·jaenga ong·ode aro niam gita kamrangko ka·jaenga ong·ode ADC-rangna sokangenggipa tangka paisarangko dontongate sorkarini kakket ong·aniko mesokna nanga ine Lyngdoh parakataha.
AITC MLA-ni parakatani gitade, tangka paisarangko name jakkaljaniara neng·nikanirangko ra·baani aro tangka paisa jakkalsretanina manderangni matnanganirangko man·anisan ong·aigija, ADC-rangna tangka paisarangko on·atenggipa ma·mong sorkarinaba ka·dongchakna man·gijani ong·gen.
Meghalaya a·dokni autonomous district council-rango tangka paisarangko jakkalsretenga ine matnangenba, Central Bureau of Investigation (CBI)-chi sandirokatchina dabitokahaoba, a·dok sorkari, dingtang dingtang dolrangni dabianiko knachakgija, GHADC aro JHADC-o bilsi 10-na account rakkianiko Directorate of Local Fund Audit (DLFA)-chisa hisap ra·china gita a·dok sorkari ge·etaniko on·skaahachim.
Indake ong·engon, DLFA-ni audit ka·anio ma·mong sorkarini Special Assistance Grant (SAG)-ni ning·o chamatgipa tangka paisarangko GHADC aro JHADC jakkalsretaha ine report-ko on·ahachim.
DLFA-ni am·sandie man·aniko District Council Affairs (DCA) department-na pakwate on·angaha aro February jaon DCA, iani bidingo aganchakaniko on·china GHADC aro JHADC-na seatahachim.
GHADC aro JHADC-na February jaon DCA seatahaoba, da·onan maming talatanirangko on·skakujaengachim.