SHILLONG: Agnipath scheme-ko ra·gatani ja·man Indian Army-o napna miksongenggipa chadamberangna Common Entrance Exam (CEE)-ko ra·jaengahani gimin Sukrobar salo, Indian Army-o napna sikenggipa bang·a chadamberangan, ma·mong sorkarini kosako jegale jingjengatanirangko dakangaha.
Ma·mong sorkarini kosako jegalenggipa chadamberang, Sukrobar salo Shillong Civil Hospital sambao jinma asonge jingjengataniko dakangaha aro iana skang, uamang jinma re·jomanikoba ong·atangaha.
Jingjengatenggipa chadamberangni parakatani gitade, 2021 bilsionin COVID giproroaniko pa·sike ma·mong sorkari, Indian Army-o rimnapna gita CEE-ko ong·atchipjahachim indiba da·o bilsibrina mangmang chadamberangko Indian Army-o rimnapna gita Agnipath scheme-ko a·bachengatani ja·man CEE-ko ong·atna jechakskaengahachim.
“Re·anggipa bilsirangode sorkari, COVID-ko pa·sike CEE-ko ong·atchipjaha indiba da·o Agnipath scheme-ko ra·gatani ja·mande ia CEE-ko ong·atna jechakskaengaha. Chinga iako raken jegala maina chinga ru·uta bilsirangonin Indian Army-o napna cholrangko senge dongpaengachim,” ine jingjengatenggipa chadamberang parakataha.
Ma·mong sorkarini ra·gatgipa Agnipath scheme-ko jegalatengon, mikkangchi CEE-ko ong·ate chadamberangko Indian Army-o napna chol on·jagenchimode bang·bata chadamberang re·bae sorkarini kosako jingjengatanggen ine chadamberang parakataha.
