SHILLONG: Sakgni BJP MLA-rang, party-oni susagen aro mikkangchi All India Trinamool Congress (AITC)-ko man·gope gipin political party-ni MLA-rangba BJP-ona re·banasienga ine state BJP Chief Ernest Mawrie, a·kangataha.
July ja bon·angchira somoirangon sawarang aro badia political dolni MLA-rang ba dilgiparang BJP-ona re·bagen iako u·itokaigen ineba aganaha.
Koborni gitade AITC-ni adita sak MLA-rang NPP aro UDP-ona re·bana chanchienga aro state BJP-ba AITC-ni dilgipa Dr Mukul Sangma aro gipinrangko uamang baksa bakrimchina changni changde jotton ka·ani giminba parakataha.
Dr Mukul Sangma-ko adita changna grongahachim indiba da·orangode agangrikna chol man·jaenga ine state BJP, ku·chakataha.
“Beben chinga batanggimin somoirangode gronge agangrikahachim indiba da·ode agangrika dongkujaenga. Chinga pilaknan do·gako oe dona, jeba re·bana sikgiparangde man·gen, Dr Mukul Sangma-san ong·ja maina darangnan party-ni do·gako oe dona.”
Uandake BJP-ni sakgni MLA-rangoni saksa NPP-o napnaba donga ine kobor jangani gimin sing·on, Mawrie, indine aganaha, “beben iandakgipa koborrang jangbingbangani donga, indiba chinga mikkang bilsi 2023 poll-o party-o dongen susagen.”
Iarangni gisepon BJP-ni vice president Bernard Marak, election-o South Tura-oni Chief Minister-ni kosako susagenma ine sing·aon, “ua Tura-ni MDC ong·a, jolni manderang uko election-o susaatna nangnika ong·ode beben, ua susagen indiba iarang gimikan party karyakarta-rangni kam ka·aniosa pangchaka,” ine aganchakangaha.
