A·doko World Drug Day-ko manianga

Shillong: Meghalaya a·gilsakni gipinrang baksa mijal Sonibar salo International Day against Drug Abuse and Illicit Trafficking-ko Shillong-ni U Soso Tham Auditorium-o maniangpaaha, jeon a·dokni Deputy Chief Minister, Prestone Tynsong, Chief Guest ong·e aro Minister, i/c Home (Police), Lahkmen Rymbui, Guest of Honour ong·e dongpaaha.
Ia manianiko a·dokni Social Welfare Department, Police, NGO aro Foundation aro gipin daitoko jako ra·giparang nangrime ong·ataha. Ia bilsini maniani ja·pang katta ‘Addressing Drug Challenges in Health and Humanitarian Crises’ ong·a jean songsalo pekgipa ringa-cha·aniko gimaatna krengani mongsonggipa ong·aniko mesokaha.
India-o pekgipa ringa-cha·aniko gelna man·gija ba ranta ong·giminrang 7.3 krormang ong·a jeoni 1.2 kror bilsi 11-oni 18-ona ong·gipa bi·sarangni gisepo ong·a. Uarangoni lak  55 me·chikrang ong·a ine Meghalaya-ni  Director General of Police, Dr. L R Bishnoi, aganaha.
Meghalaya-o bisi su·e aro gipin samko jakkalgiparangko man·chape lak 2.5-mang pekatgipa samko jakkalgiparang donga. A·doko da·o drugs badingsrukani obostako niate Meghalaya dal·batgipa pekatgipa samko badingsrukram a·dam ong·enga aro ia obostako namatna bil gnanggiparangna namen mikrakani ong·enga, DGP aganaha.
A·doko badingsrukani ramarangni aro badingsrukani ramram ong·pilaiani gimin DGP che·em che·em aganaha. Skul, college, song aro jila aro gipinrango dingtang dingtang awareness programme-ko ong·ate aro niam police dolchi namedake sandian baksana namgniko bilakbatate aro pilak daitoko jako ra·giparangni gisepo nirokanichi a·palgipa miksongani baksa department kam ka·chakatenga, DGP u·iataha.
Batanggimin sal 15-o Meghalaya Police 15061 chadamberangna a·dokgimiko sokatna skul, college aro gipin biaprango 142 drug waremess programme-rangko ong·ataha, ua agandapaha.
Deputy Chief Minister Chief Guest, pekatgipa samko jakkale ong·sia ba gelman man·gijagipa obosta chadamberangosan ong·aija indiba songsal gimikon ong·enga. Pekatgipa sam manderangko aro songsal gimikkon rusia, ua aganaha. A·doko chadambe bi·sarangni gisepo pekatgipa ringa-cha·anirang batroroengani bidingo chanchiatangko janape, bi·sarang uamangni ripengchi sin·jetako man·e sina altua. Ia salo ia obostako namatchina aro a·dokni chadamberang jedakode niam gri pekgipa samko jakkalaoniko champengna man·gen awareness-ko dakchina ua bang·a dolrangko didiaha.
Bi·sarang ba chadamberang pekatgipa samchi sin·jetaniko man·jana gita mikrak-u·iataniko man·gen skul, college-rango drug awareness programme-rangko ong·atna nanga ine Lahkmen Rymbui, Home (Police) Minister, aganaha.
Pekgipa samara kengni ong·ani bidingo lekka-pora donggipa chadamberangna agane on·ani aro uamangna agan-ku·pattie on·a mongsonggipa ong·a ine Meghalaya Chief Secretary, Rebecca V Suchiang-ba aganaha. Ringa-cha·ako watna man·gijagipa chadamberangko chel·chakna dakchakani aro lekka-pora skia man·ani skanggipa ong·a aro uamangni gisik aro be·enni gita naljokaniko on·a ku·cholsan kamko ka·na ua ma·gipa-pagipa, skigipa aro songsalko mol·molaha.