RESUBELPARA: International Day Against Drug Abuse & Illicit Trafficking-ko maniani bak gita chatro chatrirangna drugs ba pekatgipa samrangko jakkalanichi mandena namgijaniko ra·bana man·ani gimin agan-talate on·na gita Budbar salo, North Garo Hills a·jani District Social Welfare Office, awareness program-ko Mendipathar-o donggipa Ramke Memorial Secondary School-o ong·atangaha.
Ia program-ko ong·atanio North Garo Hills a·jani Additional Deputy Commissioner (ADC) Jude Rangku T Sangma, mongsonggipa sokgipa ong·e chatro chatrirangna aganprakengon, drugs-rangko jakkalgipa bang·bata chadamberangan, janggi tangani namgnirangko nikjae, an·tangtangko so·ote sianirangona sokaha ine talate on·angenba, pekatgipa bosturangoni chel·e dongchina aro an·tangtangni poraianirango gisik on·an baksana namgipa ripengrangko base an·tangtangko namao dal·atchina didianiko on·angaha.
India a·songko pekatgipa samrangoni jakgitel ong·gipa a·song ong·atna gita a·songni Prime Minister Narendra Modi-o niksamsoanirang dongani giminsa ia program-ko ong·atenga ineba Sangma parakataha.
Iana skang, dingtangmancha manderangna pekatgipa samrangni namgijaniko aro mande palsruke cha·ani bidingo mikrakataniko on·na gita jinma re·jomanikoba ong·atangaha.
Ia program-ko ong·atanio dongpae bakko ra·anggipa gipin manderangara, North Garo Hills a·jani Senior Doctor & Health Officer Dr NR Marak, Resubelpara Police Station-ni Deputy SP (Crime) VN Sangma aro gipinrang ong·a.
NGH-o Drugs jakkalani namgijaniko talate on·na program-ko ong·ata
Date:
Share post:
