Q BAGHMARA: South Garo Hills a·jani mongsongbatgipa Baghmara Civil Hospital-ko namdapatanirang dongjaengani gimin dingtang dingtang NGO-rang, Bristibar aro Sukrobar salgnina asonge jingjengatani ja·mano official-rangni aganchakanirangna suk ong·jaenba, re·baenggipa antioba jingjengatanirangko dakangkuna tik ka·e donangaha.
Ia asonge jingjengataniko South Garo Hills a·jani GSU, ADE, GSMC, FKJGP, AHAM aro AYWO dolrang, Bristibar saloni a·bachenge salgnina dakangahachim.
Indake ong·engon, NGO-rangni dabienggipani bidingo hospital-ni official-rang chu·ongnika gita aganchakaniko on·na man·jahani gimin re·baenggipa antioba apsan daken salgnina asonge jingjengatanirangko dakangkuna NGO-rang tik ka·angaha ine u·iataha.
“Chingni nangnikani gita aganchakaniko on·na man·jahani gimin chinga joljol jingjengatangkuna nangnikahachim indiba dingtang dingtang NGO-ni dilgiparang, gipin kamrangna on·kanggimin dongahani a·sel chinga re·baenggipa antini Bristibar aro Sukrobar salgnina jingjengatskana tik ka·aha,” ine GSU Southern Zone-ni president Chuang Sangma parakataha.
Baghmara civil hospital-ni nokkingrang selpruengahani a·sel sagiparangsan ong·aigija sagiparangko sanenggipa manderang, sagiparangko nitimenggipa manderang aro pilakan neng·nikanirangko chagrongna nangtokenga ine batanggimin somoirangoba NGO-rang parakatenba, ia hospital-ko ta·raken taridapchina sorkario dabiengachim ine nikna man·a.
Baghmara civil hospital-ni toilet-rang namjan baksana nalarangoni sengbegipa bibarangko man·enga aro hospital-ni bang·bata ceiling fan-rangan kam ka·jaengahani a·sel sagiparang neng·nikanirangko chagrongna nangtokenga ineba NGO-rang parakatahachim.
Indake ong·engon NGO-rangni parakatani gitade, re·anggipa Bristibar attamo Baghmara Civil Hospital-ni Medical Superintendent, NGO-ni dilgiparangko grongenba, ia hospital-ko namdapatna gita National Health Mission-na proposal-ko on·atmanaha ine aganahachim indiba iandake kam ka·ode baditaba bilsirang nangkugen ine NGO-rang, ia proposal-ko ra·chakna jechaktokaha.
“Ia hospital-o sanna bananirangko ra·enggipa manderang indita neng·nikanirangko chakna nangtokenga, uni gimin chinga ta·raken ia hospital-ko taridape on·anikosa nangnikenga. Chingni dabiani gita kamrangko ta·rake ka·jagenchimode chinga jingjengataniko dontongjawa,” ine GSU-SZ-ni president parakataha.
Baghmara hospital-ni bidingo official-rangni aganchakanina NGO-rang suk ong·ja
Date:
Share post:
