SHILLONG: Sonibar pringo Tura-o BSF truk gari a·sel ong·ao BSF-ni sakgni personnel-rang jokkom ong·aha aro boldok chonchongipa ja·sambri (LMV) garirang nosto ong·aha.
Tura-ni SP Vivekanand Singh-ni parakatani gitade, pring 11 ata bajimango a·sel ong·aha. BSF-ni truk AS-01-KC-1775 nombor donggipa, jean 181 Battalion-ni ong·achim, ua gari Tura, Nakham Bazar-o a·sel ong·aha.
A·sel ong·ani ja·pangara break fail-ni gimin ong·a ine kobor man·aha. Indiba MV inspection ba sandiani ja·mansa chong·mot ja·pangkode talna man·gen. Gari a·sel ong·ani bidingo Tura PS-o FIR-ko segataha aro mamlako am·sandina a·bachengataha.
Uandake a·sel ong·ao je garirangan nosto ong·aha, uarangara- ML-09A-7499,(Datsun Redigo), ML08A5001(Maruti Gypsy), WB-24Y-4936(Maruti Alto), WB-22U-1145(Hyundai i10), AS-01E-2600(Maruti 800), AS-01/AG-1480(Maruti 800).
Minggipin a·selo jokkom ong·gipa bang·baija saknaaha.
