TURA: Adita salrangna skang, Phulbari jolo donggipa song damsaoniko rim·gittanganga man·gipa me·chik saksa aro uni bi·sako Sonibar salo, West Garo Hills a·jani police-rang, Assam a·doko donggipa song damsaoniko jokatpilna man·aha aro ma·ningsako rim·gittanganio jak donggipa mande saksakoba rim·na man·aha ine kobor on·aha.
Police-rangni kobor on·ani gitade, re·anggipa June 20 tariko, me·chikma saksa aro uni bi·sako West Garo Hills a·jani Phulbari jolo donggipa Rongkon bazar-oniko rim·gittangangaha ine Phulbari-ni police-rang, June 22 tariko koborko man·soaha. Koborko man·soani ja·man Women Police Station-o mokordoma ka·enba, WPSI Chengmetengsil A Sangma-ni dilanichi police-rang, rim·gittanga man·gipa me·chik aro uni bi·sako sandina a·bachengataha.
July-ni 2 tariko, Garo Hills-ni police-rang, Assam a·dokni Bilasipara police station-ni ning·o donggipa Beltuli songona re·ange biap damsako chadrapeaha aro ua biapo rim·gittanga man·gipa me·chik aro bi·sako nikeaha.
Rim·gittanga man·gipa me·chik aro uni bi·sako police-rang maming a·sel nanga gri jokatna man·aha aro uamangko rim·gittanganio jak donggipa Shyamding songni bilsi 23 ong·gipa Moni Zaman-koba police-rang rim·na man·aha.
Uamang gimikkon Robibar pringo Tura-ona rimbaaha aro dos dakgipa mandeko police-rang, kacharina pakwate on·ataha.
Police-rangni u·iatani gitade, dos dakgipa mande, batanggimin somoirangonin ia me·chikko aro uni nokdangko ka·mikkenate roengachim aro ia me·chikni pagipani dokkanoba kragija kamrangko ka·rongachim.