TURA: Adita salrangna skang, All India Trinamool Congress (AITC)-ni national general secretary Abhishek Banerjee-ni Shillong-ona re·baani somoio National People’s Party (NPP)-ko Meghalaya a·doko cha·bokani sabisiko ra·bagipa dol ine matnange aganangahani gimin Mongolbar salo, West Garo Hills aro South West Garo Hills a·jao jegalgrime re·jomanirangko dakangtokaha.
Ia jegale re·jomaniko NPP-ni dilgiparang dakdilaha aro Tura-o jinma re·jomaniko dakangtokengon, AITC-ni national general secretary Abhishek Banerjee, saksa gipin a·dokoni re·bagipa mandesa ong·eba a·doko sorkariko chalaienggipa dolni kosako iandake matnanganiara kraani ong·ja ine kema bi·china dabiangtokaha.
Meghalaya a·doko songdongenggipa manderangko sabisi baksa toaniara namen kragijani aro chonnikani gita ong·aha aro iana AITC-ni dilgipa kemako bi·na nangchongmota ineba NPP-ni dilgiparang chrik a·boktokaha.
Tura-o iako jegalenggipa manderang, mitamkode Bengali ku·sikrangchi lekka paltakrangko seenba Bazar jolrang gita re·jomangtokaha aro re·jomaniko Mongolbar attamchibara Tura Bazar-o matchotataha.
“Chinga skangonin Meghalaya a·doko songdongenggiparang ong·a indiba Banerjee-ni daka kamara a·doko songdongenggipa manderangko bak ka·na jotton ka·ani gita ong·aha. Ua chinga gimikkon sabisirang gita toe aganaha aro iana ua kemako bi·na nangchongmota,” ine South West Garo Hills a·jani Mahendraganj jolo jegale re·jomanio bak ra·giparang parakataha.