SHILLONG: Re·anggipa bilsio sak 87,000 baten passenger ba songregiparang, Shillong airport-oni songreangaha, ian airport-ni mikkangchi tang·doanio chol dongako mesoka.
Statistic report-ni gitade, re·anggipa bilsi 2021 July jaoni ia bilsi 2022 June jaona sak 87,273 songregiparang, airport-oni gipin dingtang dingtang biaprangona songreangaha.
Mongsongbate 2021 bilsi December jao bang·bate sak 10,777 songregiparangni songreangako nikna man·aha.
Batanggimin bilsisa somoini gisepo Shillong airport-oni 2436 flight ba sildoreng watako nikna man·aha, indake ia bilsini March jao 254 flight-ko wataha.
Indake ong·engon Shillong airport-ni twitter-o parakatani gitade, Shillong Umroi Airport-o Courier service dongja.
“Airport-o AAI, CISF, Airlines aro bang·a gipinrang kamko ka·enga aro songregipa aro flight-ko watani batgenchimoba airport-o courier service dongkuja.”
Indiba Shillong airport-o newspaper delivery-ko adita salrang skang a·bachengataha.
Minggipin Umroi-o biap apchonani gimin bang·bate flight-ko watanio neng·nikani gimin a·dok sorkari, adita salrang skangsan Ri-bhoi ba East Kashi Hills district-o greenfield airport-ko rikna expression of interest (EoI)-ko on·aha. Da·o, Umroi airport-o ATRs-kosan operate ka·enga.
