TURA: West Garo Hills a·jani a·kawe jolrango voltage chu·ongjae, bijoli jakkalenggipa manderang neng·nikanirangko chagrongna nangtokenga ine kobor on·aha.
Kobor on·timgiparangni u·iatani gitade, 2013-15 bilsirangoba voltage chu·ongjae bijoli jakkalgiparang neng·nikanirangko chagrongna nangtokachim aro ja·mano ia biaprango voltage chu·onggijaniko namatna man·ahaoba da·o changsataie, ia bilsio apsan daken voltage chu·ongjae, bijoli jakkalenggipa manderang da·o jasa batpile neng·nikanirangko chagrongna nangtaiengahachim.
Indake ong·engon, ia jolrangna bijoliko on·enggipa 132 KV grid line-ona ra·baenggipa bijolian komiengkuani gimin voltage-rang dingtangkujanaba gnang aro Chibinang-o gital rikgipa power grid-ko ta·raken a·bachengatkujaskalde ia jolrango bijoliko chu·onga gita on·na man·kujanaba gnang ine MeECL official-rang parakataha.
“Ia jolrango voltage chu·ongjaengani a·selan chinga fan-rangkoba watna man·jae ding·ako chake dongtokna nangenga. Fan-rangko watanide chel·srangkua maina chinga iandakgipa voltage-chi an·tangtangni mobile phone-rangkon charge ka·na man·jaenga. Ian ge·a gamani somoiba ong·engani gimin iandakgipa obostaode game ge·e cha·enggipa manderangba neng·nikanirangko man·na nangtokgenok,” ine Phulbari songni saksa Rassel Choudhury parakataha.
Ia jolrango voltage chu·ongjaengan baksana bijoli sirongengani a·selba jolo songdongenggipa manderang neng·nikanirangko chagrongna nangtokenga ine kobor on·aha.
Jolo songdongenggipa mitam manderangni parakatani gitade, ia jolrango basakobarangde salo konta 2 ba konta 3-mangni gitasan bijoliko man·enga aro attamrangode 20 volt-rangni gitasan bijoliko man·engani gimin songni manderang bilongen neng·nikanirangko chagrongna nangtokenga.
Iani bidingo Phulbari-ni MLA SG Esmatur Mominin-ba an·tangni suk ong·gijaniko parakataha.
“Iani bidingo anga power minister aro power department-ni director baksa agangrikmanaha aro Chandigre-o donggipa power grid-ko charge ka·china didiataha,” ine Mominin parakataha.
