BAGHMARA: Re·anggipa Sonibar salo, South Garo Hills a·jani police-rang, bilsi 50 ong·gipa mande saksani manggisiko, South Garo Hills a·jani Baghmara samba jolo donggipa Simsang chibimaoniko man·aha.
Koborko on·ani gitade, Simsang chibimao mande saksani manggisi balboe dongenga ine jolni manderang koborko on·ani ja·man, police-rang ua biapona re·angenba, ia mandeni manggisiko chioniko ra·ongkatna man·aha.
Manggisiko chioniko ra·ongkaton ia mandeni manggisiara, bilsi 50 ong·gipa saksa Joren Marak-ni manggisi ong·a ine songni manderang ma·sina gita man·aha.
Indake ong·genchimoba, ia mandeni ma·drangrangko darangba ma·sigipa dongjae, iani bidingo koborko on·na man·kujaenga ine u·iataha.
Jolo songdongenggipa manderangni u·iatani gitade, ia mandeara Baghmara-o jabolrangko gale cha·enggipa mande ong·achim aro ua Baghmara New Market-o dongengachim.
“Ia mande, batanggimin bilsi 40-na Baghmara-o dongengachim indiba darangan uni ma·drangrangni gimin ma·sigiparang dongjachim. Ia mandeni ma·drangrangni gimin saoba ma·sigiparang donggenchimode, ia mandeni manggisiko on·atna man·na gita re·bae Baghmara PCR-na u·iatchina mol·molatenga,” ine South Garo Hills a·jani Superintendent of Police (SP) Rithuraj Ravi parakataha.
Ia mandeni siani bidingo police-rang maming ong·gija dakanirangko nikkujaenga indiba post mortem-ni report-na sengengkua ineba SP parakataha.