TURA: Meghalaya a·dok gimiko dam 154 secondary skulrangba gipin skulrang gitan apsan kamrangko ka·engoba ia skulrango Science grant-mangmangkosan man·enga ine a·dokni Chief Minister Conrad Sangma-na badi ka·doatenba, ia skulrangnaba gipin adhoc secondary skulrang gitan adhoc grant-ko on·china didiataha.
Iani bidingo, West Garo Hills a·jao donggipa Khamari Secondary School-ni headmaster Rahmat Ali, a·dokni Chief Minister-na sedoatengon, ia secondary skulrangna 2002 bilsionin Science grant-mangmangkosan on·engani a·sel skulko chalaianio neng·nikanirangko man·na nangenga ine parakataha.
“Meghalaya a·dok gimiko dam 154 secondary skulrangba gipin skulrang gitan chatro chatrirangna lekka porako on·engachim indiba ia skulrangna da·onan Science grant-kosan on·enga. Ia skulrango sak 770-mangni gita skigiparang, sak 7000-oni sak 8000-mangni gita chatro chatrirangna a·gilsakni seng·aniko skie on·enga indiba ia skigiparang da·onan adhoc grant-ko man·pakujaenga,” ine Ali parakataha.
Adhoc skulrango skigiparangni dormaharangko bariatahani gimin MDA sorkariko mittelpilatengon, ia skulrango skigiparangnade da·onan dormaharangkoba bariatkujaenga aro adhoc grant-koba on·kujaenga ine skulni headmaster suk ong·gijaniko parakataha.
Skulo poraienggipa chatro chatrirangni namgnina ia skulrangnaba adhoc grant-ko ta·raken on·china gitaba ua Chief Minister-ko mol·molataha.